माओवादी व मधेशवादी दलत दथुइ सहलह
एकीकृत नेकपा (माओवादी) व स्वंगू मधेशवादी दलत दथुइ न्हूगु सरकार गठनया बारे सहलह जूगु दु ।
बिहीवाः तराई मधेश लोकतान्त्रिक पार्टी (तमलोपा)या सिंहदरवार स्थित संसदीय दलया ज्याकूथी जूगु वार्ताय् माओवादीं थःगु नेतृत्वय् राष्ट्रिय सहमतिया सरकार गठन यायेत ग्वाहालि यायेत मधेशवादी दलतय्त इनाप याःगु खः । माओवादी थःगु नेतृत्वय् राष्ट्रिय सरकार गठन जुइगु सुनिश्चित जुसाः सेना समायोजनया बारे कार्यतालिका पिने ह्येत थःपिं तयार जूगु खँ धाःगु खः ।
उगु इलय् मधेशवादी दलतय्सं माओवादीं मधेशीतय् मुद्दायात सम्बोधन याःसा माओवादी नेतृत्वया सरकारया बारे बिचाः यायेफइगु खँ धाःगु खःसा माओवादीं मधेशीतय् मुद्दाया बारे सहलह यानाः समाधान यायेफइगु खँ धाःगु खः ।
अथेहे मधेशवादी दलतय्सं माओवादीं दक्वं दलयात विश्वासय् कयाः न्ह्याः वंसा वया नेतृत्वया सरकार स्वीकार यायेफइगु खँ धाःगु खः । बैठकय् मधेशी जनअधिकार फोरम (लोकतान्त्रिक), तमलोपा व सद्भावना पार्टीया ब्वति दुगु खः ।
