जि नं प्रधानमन्त्रीया दाबेदार : गुरुङ
नेपाली कांग्रेसया महामन्त्री कुलबहादुर गुरुङं थः नं प्रधानमन्त्रीया निंतिं छम्ह दाबेदार जूगु खँ धयादीगु दु । वय्कलं यदि सरकार कांग्रेसया नेतृत्वय् गठन जुइसाः उकीया निंतिं पार्टी दुने पाखें छम्ह उम्मेदवार जूगु धयादिल ।
बुधवा: येँय् जूगु तरुण दलया छगू ज्याझ्वः लिपा पत्रकारत नाप खँल्हाबंला यानादिसें वय्कलं कांग्रेस पाखें सुसु उम्मेदावर खः धइगु बारे थम्ह मस्यूगु धयादिसें थ: हे प्रधानमन्त्री जुसां मजुसां प्रधानमन्त्रीया दाबेदार धाःसा जूगु धयादिल ।
तर वय्कलं कांग्रेसया प्राथमिकता आः सरकार गठन यायेगु खँय् मजूगु धयादिसें शान्ति प्रकृयायात तार्किक निष्कर्षय् थ्यंकेगू खँ महत्वपूर्ण जूगु धयादिल । वय्कलं १२ बुँदे सम्झौता निसें जेठ १४ गते स्वंगू दलत दथुइ जूगु सहमति कार्यन्वयन जुइमा:गु न्हापांगु खँ जूगु व वयां लिपा जक सरकार गठनया खँ जुइमाःगु धयादिल ।
