देय्न्यंकया भन्सार ठप्प
विराटनगर जोगवनीया भन्सार प्रमुखयात मोरङ प्रमुख जिल्ला अधिकारीं दुर्व्यवहार याःगु विरोधय् देय्न्यंकया प्रमुख भन्सार नाकात बुधवाः बन्द जूगु दु । जोगवनी भन्सरया प्रमुख मित्रलाल रेग्मी सहित प्यम्ह कर्मचारीतय्त मोरङ प्रजिअ शशीशेखर श्रेष्ठया उजं कथं मंगलवाः बहनी सशस्त्र प्रहरीं ज्वनाः यंकूगु खःसा उगु इलय् उमित मानसिक यातना ब्यूगु खँ धाःगु दु ।
बुधवाः जोगवनी नापं तातोपनी, वीरगंज, भैरहवा व सुख्खा बन्दरगाह नं बन्द जूगु खः । प्रमुख भन्सार नाकात ठप्प जुइवं करोडौं राजस्व असुली प्रभावित जूगु दु । थुगु घटना सम्बन्धी छानबीन यायेत अर्थ मन्त्रालयया सहसचिव शान्तराज सुवेदी व गृहया सहसचिव शंकर कोइराला विराटनगर थ्यंकूगु दु । आन्दोलित कर्मचारीतय्सं धाःसा दुर्व्यवहार याम्ह प्रजिअ श्रेष्ठं राजीनामा मबीकं आन्दोलन मदिकेगु ख्याच्वः ब्यूगु दु ।
