एमआरपीया ठेक्का फ्रान्सेली कम्पनीयात
परराष्ट्र मन्त्रालयं मेसिन रिडेवल पासपोर्ट (एमआरपी) छापे यायेगु ठेक्का फ्रान्सेली कम्पनी ओबरथरयात ब्यूगु दु । एमआरपी ठेक्का सम्बन्धी मूल्यांकन समितिं पेश याःगु प्रतिवेदनया आधारय् पासपोर्ट छापे यायेगु जिम्मा ओबरथरयात बीगु निर्णय याःगु खः ।
शिष्टाचार महापाल मुक्तिनाथ भट्टया संयोजकत्वय् गठित समितिं दकलय् न्यून मूल्यय् एमआरपी बुक उपलब्ध यायेगु प्रस्ताव याःगु ओबरथरयात ठेक्का बीगू प्रतिवेदन पेश याःगु खः । शिष्टाचार महापाल भट्टं मंगलवाः परराष्ट्र सचिव मदनकुमार भट्टराईयात उगु प्रतिवेदन लःलहाःगु खः ।
परराष्ट्र मन्त्रालयं निगूगु पटक एमआरपीया निंतिं बोलपत्र आह्वान याःगु इलय् झिंखुगू विदेशी कम्पनीं आवेदन न्यानाकाःगु खःसां अन्तिम मिति तक छपाईया निंतिं फ्रान्सेली ओबरथर कम्पनी सहित बेलायतया देलारु, तेरमपुरी व सिंगापुरया थ्रीएम टेक्नोलोजिजं जक फारम ब्यूगु खः ।
ओबरथरं प्रतिबुक ३.५९ अमेरिकी डलरय् एमआरपी छापे यायेगु प्रस्ताव याःगु खःसा तेरमपुरीं ५.९९, थ्रीएमं ४.५० व देलारुं ६.९९ डलरया प्रस्ताव याःगु खः ।
थ्वस्वयां न्ह्यः सरकारं भारतया कम्पनीयात एमआरपी छपाईया ठेक्का ब्यूगु खःसां उगु प्रकृया टेन्डर हे आह्वान मयायेकं सरकारं निर्णय याःगु धकाः थीथी ख्यलं कुंखिनेवं उगु टेन्डर प्रक्रिया रद्द यायेत सरकार बाध्य जूगु खः ।
