कांग्रेस-झिगू दल सहलह / माओवादीं राप्रपा व राजपानाप
न्हूगु राष्ट्रिय सरकार गठन यायेगु विषयलय् सहलह यायेत थीथी दलं थौं नं खँल्हाबंलायात निरन्तरता ब्यूगु दु । मंगलवाः नेपाली कांग्रेसं सत्ता साझेदार झिगू दलनाप सहलह याःगु दुसाः एनेकपा (माओवादीं) राष्ट्रिय प्रजातन्त्र पार्टी (राप्रपा) व राष्ट्रिय जनशक्ति पार्टी (राजपा)या नेतात नाप खँल्हाबंला याःगु दु ।
कांग्रेस व सत्ता साझेदार झिगू दलत दथुइ जूगु खँल्हाबंलाय् नेतातय्सं जेठ १४ गते जूगु सहमति कार्यन्वयन यायेत माओवादी गम्भीर मजूगु खँ प्रति चिन्ता प्वंकूसें माओवादीं सहमति कार्यन्वयन मयायेकं माओवादी सहितया राष्ट्रिय सहमतिया सरकार गठन यायेमफइगु खँ धाःगु खः ।
उगु इलय् कांग्रेस नेतातय्सं थःपिं दक्वं दलत दुथ्याःगु सहमतिया सरकार गठन जुइमाःगु पक्षय् दुगु धासें उकीया निंतिं शान्ति प्रकृया नाप स्वा:गु प्रतिबद्धता पूवनेमाःगु खँय् बः ब्यूगु खः । नापं माओवादी पुलांगु सहमति कार्यन्वयन यायेत उदासीन जूगु बिचाः प्वंकूगु खः ।
थ्वहे दथुइ माओवादीं थःगु नेतृत्वया सरकार गठनय् ग्वाहालि यायेत राप्रपा व राजपाया नेतातय् इनाप याःगु दु । सिंहदरवार स्थित माओवादी संसदीय दलया ज्याकूथीइ जूगु बैठकय् राप्रपा व राजपाया नेतातय्सं सहमतिय सरकार गठनय् बः ब्यूसें माओवादी नेतृत्वया सरकार गठन यायेत कांग्रेस व एमालेयात विश्वासय् कायेत सुझाव ब्यूगु दु ।
