अपहरित मचाया विभत्स हत्या
कारवाहीलय् स्वम्ह अपहरणकारी सित
येँ (सन्ध्या टाइम्स)/म्हमसिउपिं मनूतय्सं अपहरण याना यंकातःम्ह सुनसरीया भोक्राहा गाविस वडा नं ७ या ७ दँ दुम्ह मचायात विभत्स कथं स्यानाः वांछ्वयातःगु अवस्थाय् लुयावःगु दु ।
श्रवण यादवया काय निरन्जन यादवयात गः कियाः स्यानातःगु अवस्थाय् लुइकूगु खः। सुनसरीया सदरमुकाम इनरुवाया इनरुवा बोर्डिङ स्कुलया युकेजीइ आखः ब्वनाच्वंम्ह निरन्जनयात वंगु शनिवाः छेँ लिक्क लागां अपहरण याना यंकूगु खः ।
अपहरण लिपा छेँजःपिंसं माः वनेगु झ्वलय् विहार राज्यया सुपौल जिल्ला अन्तर्गत करजाइन बजार लिक्क मचाया सीम्ह लुयावःगु खँ सुनसरीया प्रहरीं न्ह्यथंगु दु। भारतय् मचायात स्यानातःगु अवस्थाय् लुयावःगुलिं भारतीय प्रहरीलिसे समन्वय यानाः म्हिगः हे सुनसरीइ मचाया सीम्ह हःगु दु। मचायात सुनां प छाय् अपहरण यानाः स्याना बिल धइगु खँ सीके मफुनिगु खँ धाःगु दु ।
थ्वहे दथुइ बाँकेया फत्तेपुरय् प्रहरी व अपहरण कारीया दथुइ गोलीं कयेका ल्वापु जुयाः स्वम्ह अपहरणकारी सीगु दु। आइतवाः अपहरणकारीतय्सं स्वम्हेसित अपहरण याना यंकूगु खः। बाँके प्रहरीं ल्वापुइ लानाः सीपिं अपहरणकारीत मेमेपिं नं दयेफु धकाः धाःगु दु। अपहरण लिपा प्रहरीं व्यापक रुपं मालेगु ज्या यानाच्वंगु खः। इमिसं छाय् अपहरण याना यंकूगु खः धकाः सीके मफुनि। अपहरणय् लाःपिं मनूत छेँय् लिहां वये धुंकूगु दु ।
