निथाय् जूगु दुर्घटनाय् प्यम्ह सित
येँ (सन्ध्या टाइम्स)/उदयपुरया कटारी मिर्चैया सडक खण्डय् वंगु चान्हय् छगः मालवाहक ट्रकं ठक्कर नकाः निम्ह लँजुवाःत सीगु दु। ना. २ ख ५७३४ नम्बरया ट्रकं ठक्कर नकाः अनया ४५ दँ दु्म्ह धनबहादुर थापा व १९ दँ दुम्ह अमृत दाहाल सीगु खः। उगु दुर्घटना लिपा ट्रक व चालकयात प्रहरीं नियन्त्रणय् कयातःगु दु। उगु घटनायात कयाः स्थानीय मनूतय्सं थौं सुथंनिसें क्षतिपूर्ति बीमाःगु नापं चालकयात कारवाही यायेमाःगु माग यानाः प्रदर्शन याःगु दु। अथे हे पूर्वपश्चिम राजमार्ग अन्तर्गत महोत्तरीया बर्दिवासय् थौं सुथय् जूगु सवारी दुर्घटनाय् लानाः निम्ह मनू सीगु दु ।
बसं मोटरसाईकलयात ठक्कर नकाः जूगु दुर्घटनाय् लानाः मोटरसाइकलय् च्वनावःपिं निम्हं मनू सीगु खः। ज. १ ख ६९१ नम्बरया बसं बा. १८ प ९९५२ नम्बरया मोटरसाइकलयात ठक्कर नकूगु खः। दुर्घटनाय् लानाः सीपिं मध्ये मोटरसाइकलय् च्वनावःपिं धादिङया शिवकुमार कार्कीया जक सनाखत जुइधुंकूगु दुसा मेम्ह छम्हेसिया सनाखत हे मजूनिगु खँ प्रहरीं धाःगु दु ।
