स्वयम्भूइ झिंछन्हु यंकंया तःधंगु पूजा
येँ (सन्ध्या टाइम्स)/स्वयम्भू ब्यवस्थापन तथा संरक्षण महासमिति व स्वयम्भू बुद्धाचार्य परिवारया मंकाः ग्वसालय् स्वयम्भू झिंछन्हुयंकं तःधंगु पूजा न्ह्यानाच्वंगु दु। तिब्बतं झाःम्ह दाता ताप्थाङ रिम्पोछेपाखें निदँ न्ह्यवंनिसें न्ह्यानाच्वंगु स्वयम्भूया मर्मत, सम्हार व जीर्णोद्धार ज्या क्वचाःगु लसताय् उकथंया अहोरात्री महायज्ञ प्रतिष्ठापन पूजा न्ह्यानाच्वंगु खः। उगु पूजा चांन्हिं न्ह्यानाच्वंगुलिं थःगु अनुकूलया ई लाकाः उगु पूजाय् सहभागी जुइत स्वयम्भू ब्यवस्थापन तथा संरक्षण महासमितिं इनाप याःगु दु ।
क्यालिफोर्नियाय् मू ज्याकू जुयाच्वंगु तिब्बती मिग्मा मेडिटेशन सेन्टरया अध्यक्ष जुयाच्वंम्ह रिम्पोछे उगु मर्मत सम्हारय् गुलि दां लगे जुल धाःसा धाये चाहे मजू। वंगु असार ११ गते न्ह्याःगु उगु पूजा आः वइगु असार २६ गते तक न्ह्याइगु खँ स्वयम्भू ब्यवस्थापन तथा संरक्षण महासमितिया महासचिव महेन्द्र बुद्धाचार्यं सन्ध्या टाइम्स यात कनादिल ।
