चीनं बिउगु शून्य
भंसार सुविधाया लबः कम
येँ (सन्ध्या टाइम्स)/चीनं नेपाःया ३६१ गू वस्तुयात शून्य भंसारय् आयात यायेगु सुविधा बीवं उत्साहित जूपिं व्यापारीतय्सं आः थुकिया निंतिं सरकारं विशेष प्याकेज दयेकाः चीनय् थःपिनि सामान निर्यात यायेगु व्यवस्था यायेमाः धकाः माग याना हःगु दुसां सरकारं धाःसा चीनं बिउगु ३६१ गू वस्तुया थ्व छुट नेपाःया लागिं पर्याप्त मजूगुलिं चीनलिसे थुकिया बारे द्विपक्षीय सम्झौता यायेमानि धाःगु दु ।
चीनं आः बिउगु थ्व सुविधा नेपाः याकःचिगु लागिं धाःसा मखु। थ्व नेपाः लगायत विश्वया फुक्क हे अल्प विकसित राष्ट्रतय्त चीनं बिउगु सुविधा खः। चीनं फुक्क हे देशयात ३६१ गू सामान भंसार हे मकासे थःगु देशय् दुकायेगु धकाः सुविधा बिउसां उकी नेपाःपाखें निर्यात याये फइगु करिब सछिगू जक सामान दुथ्याःगु खँ व्यापारिक सूत्रं धाःगु दु। थज्याःगु सुविधाया लागिं नेपालं चीनलिसे निगू पक्षीय सम्झौता यायेगु कुतः यानाच्वंगु दु। उकी नेपालं थःपिंसं निकासी याये फइगु करिब द्वःछिगू वस्तुयात शून्य भंसारया छुट बीत इनाप यानातःगु दु ।
चीनं आः फुकसित मंकाः रुपं बिउगु छुट सिबें नेपाःया याकःचित बीगु विशेष छुटपाखें झीसं यक्व लबः काये फइगु बिचाः सरकारी अधिकारीतय्सं तयाच्वंगु दु ।
उखे चीनलिसे न्हापांनिसें व्यापार याना वयाच्वंपिं व्यापारीतय्सं धाःसा चीनं बिउगु थ्व छुटपाखें नं नेपालं लबः काये फइ मखु धयाहःगु दु। चीनयात माःगु आपालं सामान नेपालय् मदुगु, दुगुली नं गुणस्तर मगाःगु, नेपाःया सामान सिबें चिनियाँ सामान तसकं दंगुलिं धेंधेंबल्लाः यायेत थाकुइगु आदि आपालं कारणं यानाः नेपालं खास हे लबः काये मफइगु बिचाः उमिसं प्वंकूगु दु ।
भारतपाखे नं माग चीनं नेपाःया ३६१ गू वस्तुयात शून्य भंसारय् आयात यायेगु सुविधा बीगु धकाः घोषणा यायेवं आः नेपालं भारतपाखे नं अज्याःगु छुट कायेगु लागिं पहल जुइमाःगु माग व्यापारी ख्यलं पिहां वःगु दु। नेपालं थःपिनि कुल व्यापारया ५८ प्रतिशत भारतलिसे जक यानाच्वंगु व भारतलिसे नेपाःया व्यापार घाटा नं तसकं अप्वः दुगुलिं भारतपाखें नं नेपालं थज्याःगु छुटया सुविधा कायेमाःगु माग थन जूगु खः। ब्यापारघाटां नेपाःया अर्थतन्त्र हे प्रभावित दु ।
