मिस्तय् नामय् जग्गा दर्ता अप्वः
येँ (सन्ध्या टाइम्स)/मिस्तय् नामय् जग्गा पास यात धाःसा रजिष्टेशनय् २५ प्रतिशत तक छुट बीगु व्यवस्था जुइवं दाङ्गय् उकिया लबः कयाः मिस्तय् नामय् जग्गा पास याः वइपिनि ल्याः अप्वःगु दु ।
दाङ्गया मालपोत कार्यालयं धाः कथं थ्व छुटया व्यवस्था जुइवं थ्वहे आर्थिक दँय् जक ७,८३८ म्ह मिस्तय्सं थःपिनि नामय् जग्गा दर्ता याः वयेधुंकल। थुलि मिस्तय्सं जग्गा दर्ता याःगुलिं उमिसं कुल १ करोड ३३ लाख ७८,६७९ तका बराबरया राजश्व छुट कायेधुंकूगु दु ।
मिस्तय् नामय् जग्गा दर्ता यायेबलय् मिस्त लय्ताइगु जक मखु कि थुकिं उमिगु आत्मबल तकं थकया बीगु खँ जग्गा दर्ता जूपिं मिस्तय्सं धाःगु दु ।
सरकारं अपाङ्ग नापं जनआन्दोलन ब्व-२ लय् घाःपाः जूपिनि नामय् जग्गा दर्ता यात धाःसा राजश्व पूरा हे मिनाहा याना बीगु नीति हयातःगु दुसां दाङ्गय् आः तक थ्व सुविधा सुनां नं मकाःनिगु खँ धाःगु दु ।
