९५ अर्बया कामचलाउ बजेट हयेगु तयारी
येँ (सन्ध्या टाइम्स)/सरकारं तयार यानातःगु नियमित बजेट इलय् वइगु सम्भावना म्हो जुइवं सरकारं आः तत्कालया लागिं कामचलाउ बजेट हयेगु तयारी याःगु दु ।
थ्वहे वइगु असार २८ गते अज्याःगु बजेट हयेगु लागिं अर्थ मन्त्रालयं ज्या यानाच्वंगु खँ धाःगु दु। यदि असार मसान्त तकया दुने नं नियमित बजेट हये मफुत धाःसा देशय् तःधंगु आर्थिक समस्या वइगु जूगुलिं उकियात समाधान यायेगु ताः तयाः सरकारं थज्याःगु कामचलाउ बजेट हयेत्यंगु खः।
थज्याःगु बजेट हयेगु लागिं माओवादीं नं स्वीकृति बीधुंकूगु खँ धाःगु दु। संविधानसभाया अध्यक्ष सुभाष नेम्बाङं देय्या आर्थिक समस्या तत्काल ज्यंकेया लागिं थज्याःगु बजेटसां हयेमाली धकाः पहल यानादीगु खः। थ्वहे झ्वलय् माओवादीं नं उकी सहमति क्यंगु खःसा माओवादी सहमतिया नापनापं अर्थ मन्त्रालयं बजेट दयेकेगु ज्या नं शुरु याःगु खः ।
थ्व कामचलाउ बजेट करिब ९५ अर्ब तकाया जुइगु खँ सूत्रं धाःगु दु। थज्याःगु बजेट मेगु स्वला तक ज्या याये फइ। थ्व बजेट खास यानाः कर्मचारीतय्त तलब बीत व मेगु मजिमगाःगु ज्या यायेगु लागिं हयेत्यंगु खः। आर्थिक नियम कथं चालू आर्थिक बजेटया स्वब्वय् छब्व बराबरया दां लिकयाः थज्याःगु बजेट तयार याये जिउ। थ्व बजेट नं वर्तमान कामचलाउ सरकारया अर्थ मन्त्री सुरेन्द्र पाण्डें हे सदनय् पेश यानादी। थुकी न्हूगु छुं हे कार्यक्रम वइ मखु। पुलांगु सिधयेकेमाःगु छुं ज्याझ्वः सिधयेकेगु ज्या जक थुकिं याइ ।
