पन्तिइ तःजिगु नेपालभाषा कवि गोष्ठी
पन्ति (सन्ध्या टाइम्स)/नेपाल प्रज्ञा प्रतिष्ठान (मातृभाषा साहित्य विभाग) व जनमत प्रकाशनया मंकाः ग्वसालय् नेपालभाषा कवि गोष्ठी जुल। गोष्ठीइ प्राज्ञ विष्णु प्रभातया लिसें जनकवि दुर्गालाल, मोहन दुवाल, नवीन चित्रकार, प्रतिसरा साय्मि, सिर्जना दुवाल, शाक्य सुरेनपिंसं थःथःगु कविता न्यंकादीगु खः। ज्याझ्वलय् येँ, यल, ख्वप, भ्वत, नाला, पन्ति व तनहुँया कविपिनिगु सहभागिता दुगु खः ।
ज्याझ्वलय् न्ववासें मूपाहां सत्यमोहन जोशीं मेगु थाय्या नेवाः भाय्यात गामाः भाय् धकाः हिस्यायेगु चलन न्हापा दुगुलिं यक्व पिने पिनेया लागाया नेवाःतय्सं थःगु थासय् नेवाः बसोबास यक्व दुसां अन च्वंपिंसं थःगु भाय् त्वःतेगु याना वनाच्वंगुलिं राष्ट्रिय परिप्रेक्ष्यय् नेवाःतय्गु वास्तविक ल्याःचाः काये थाकुयाच्वंगु खँ कनादिल। नेवाःतय् थीथी थासय् भचाभचा भाय् पाना वनाच्वंसां राष्ट्रिय ख्यलय् धाःसा येँयागु भाय्या स्वरुपयात स्तरीय भाय् धकाः नाला कायेमाःगु बः बियादिल ।
लिसें आः याकनं न्ह्याइगु राष्ट्रिय जनगणनाय् देय्या दक्वथासय् च्वंपिंसं गणना काः वलकि थःगु जातीय पहिचान स्पष्ट बीगु व मांभाय्या सवालय् थाकु मचासे नेवार भाषा धकाः हे च्वकेमाल धयादिल। दुर्गालाल श्रेष्ठं न्हापा पंचायत कालय् सत्तां त्यतुमतु त्यलातःबलय् बरु साहित्यिक गोष्ठीत झःझः धाः तर थ्व खुल्ला वातावरणय् सहभागी झन् झन् म्हो जुजुं वनाच्वंगु खँय् चिउताः प्वंकादिल। प्राज्ञ सुलोचना मानन्धरं पन्तिइ वयाः कवि गोष्ठी यायेखंगु व अन तःधंगु सहभागिता दुगुयात प्रतिष्ठानया हे सफलता खः धयादिल ।
ज्याझ्वःयात काभ्रे नेवाः पुचः व पनौती साहित्य संगमं नं सहआयोजक कथं ग्वाहालि याःगु खः ।
