चलखं ल्हानाः प्यखा छेँया न्हय्म्ह मनू बेपत्ता
येँ (सन्ध्या टाइम्स)/धादिङया गुम्दी गाविस वडा नं. २ या बरदान गामय् वंगु चान्हय् आकाझाकां चलः वनाः गुरुङतय्गु प्यखा छेँ ल्हाःगु दुसा न्हय्म्ह मनू बेपत्ता जूगु दु ।
निम्ह मनूतय्त धाःसा सकुशल उद्धार याःगु दुसा इपिं मध्ये छम्ह धनबहादुर गुरुङ गम्भीर अवस्थाय् दु ।
चलखं ल्हानाः बेपत्ता जुयाच्वंपिं ३४ दँया मीनबहादुर गुरुङ, १३ दँया मनमाया गुरुङ, ३१ दँया दिवमाया गुरुङ, १५ दँया टिकामाया गुरुङ, ७ दँया सोमित गुरुङ, ३५ दँया माईलीमाया गुरुङ व ६२ दँया तेलमाया गुरुङ खः। घटनास्थलय् सुथय् हे प्रहरी व स्थानीयवासीत थ्यंकः वंगु खःसा उपिंपाखें हे अन उद्धार यायेगु ज्या जुयाच्वंगु दु। मदिक्क वा वःगुलिं चान्हय् १ बजे आकाझाकां अन चलः वंगु खः ।
अथे हे स्याङजाय् रापकोटय् चलः वनाः दरौ खुसि पना बिउगुलिं अनया न्यासःखां मल्याक छेँ खतराय् लाःगु दु। चान्हय् ३ बजे चलः वनाः उगु खुसिया लः पना बिउगु खः। चलः वनाः कुना बिउगु खुसिया लः बाः वयाः अनया अर्जुनचौपारी, रिमाल, फेदी, नब्बे बजार व हेल्यु लखं डुबे जुइगु संभावना अप्वयावःगु दु ।
