आः कुवेतय् नेपाःमितय्त कडा

येँ (सन्ध्या टाइम्स)/कुवेतय् नेपाली दूतावासपाखें प्रमाणित भ्वं मज्वंपिं ज्यामितय्त कडा याःगु दु ।

बैदेशिक रोजगार ब्यवसायी तथा दलालं नक्कली भ्वं बियाः कुवेत छ्वया हःगु खनेवं दूतावासया इनापय् कुवेत सरकारं कडाई याःगु खः। दूतावासं प्रमाणित भ्वं स्वयाः जक आवासीय भीसा बीत कुवेत सरकारयात इनाप याःगु दु ।

कुवेतया अध्यागमन विभागं फोटो हिलातःपिं, नक्कली भ्वं दुपिं धकाः न्याम्ह मिस्तय्त स्वदेश लित छ्वयाहःगु दु। कुवेतया नेपाली दूतावासं थुकिया बारे जानकारी बिसें ज्यामि, एजेण्ट, बैदेशिक रोजगार ब्यवसायीयात प्रमाणित भ्वं कयाः जक वयेत व छ्वया हयेत इनाप याःगु दु ।

दूतावासया कथं आवासीय भिसाया लागिं कुवेत वइपिं ज्यामितय् भ्वं नक्कली लूगु दु। अज्याःगु भ्वं दुपिं ज्यामितय्त स्वदेश लित हयेगु व जेल वनेमाःगु अवस्था वयेवं उमिसं कडाई याःगु खः। कुवेतय् निम्ह मिसाया प्रवेश भिसा ज्वना वंम्ह व अन ज्या याइगु कम्पनी वा कुवेती स्पोन्सरं ज्यामिया आवासीय भिसा मिले याना बीगु कानुनी ब्यवस्था दु। 'थुकिया लागिं प्रहरीं जारी याःगु चारित्रिक प्रमाणपत्रयात परराष्ट्रं प्रमाणित याःगु जुइमाः' अनया नेपाली राजदूत मधुवन पौडेलं धयादी, 'हाल दूतावासय् पेश जूवःगु चारित्रिक प्रमाणपत्र सम्वन्धी भ्वं नक्कली जूगु सीदुगु दु ।

अज्याःगु भ्वँतय् दूतावासं प्रमाणित याइ मखु। अथे जुयाः आवासीय भिसा लगे जुइ मफइगु कारणं ज्यामित देशय् लिहां वयेमाःगु व जेल वनेमाःगु अवस्था दु ।'

मिस्त नापं निजी भिसा (भिसा नं. २०) य् वइपिं ज्यामितय्त नं थ्व भ्वं बाहेक बीमा पोलिसी व सेवा प्रमाणपत्रया सक्कली प्रमाणित प्रति जक ज्वना वयेत इनाप याःगु दु। अथे जुयाः सेवाय् वनीपिं ज्यामितय् लागिं दूतावासं बीमाया ब्यवस्था याःगु दु। बीमा पोलिसी मंत धाःसा क्षति पूर्ति मदइगु व सित धाःसा ज्यामिया सीम्ह तकं नेपाः छ्वया हये मफइगु ख्याच्वः नं दूतावासं बिउगु दु ।

कम्पनी वा स्पोन्सरया नां दुगु भ्वँतय् दूतावासं प्रमाणित याःगु भ्वं स्वयेत नं सचेत याःगु दु। आः दूतावासं ज्यामितय् नां वेब साइटय् तःगु दु। उकिं वइपिं ज्यामितय्सं वेबसाइट स्वयाः थःगु नां पत्ता लगे याये फइगु जूगु दु। उकी थःपिनं नां मदुपिं ज्यामित कुवेत वयाः फँसे मजूसां जिउगु नं दूतावासया सुझाव दु ।