टेलिकमं यानाः नेप्से कुहां वल
येँ (सन्ध्या टाइम्स)/नेपाःया शेयर मार्केट नं अझ कुहां वल। वंगु छुं न्हि न्ह्यवंनिसें कुहां वयाच्वंगु शेयर बजाःयात म्हिगः अझ कुहां वयेगु लागिं नेपाल टेलिकमया शेयरं ग्वाहालि याःगु खः। म्हिगः टेलिकमया शेयर प्रति शेयर १७ तकाया दरं कुहां वःगु खःसा उकिया नापनापं मेगु छुं वाणिज्य बैंकतय् शेयर भाः नं कुहां वःगु खः। म्हिगः शेयर बजाः ६.२२ अंकं कुहां वयाः ४६४.६९ विन्दुइ थ्यं वःगु खः ।
म्हिगः जूगु कारोवारय् वाणिज्य बैंक, वित्तीय समूह व विकास बैंकतय् शेयर भाः कुहां वःगु खः। जलविद्युत समूहया भाः धाःसा ३०.४३ अंकं थहां वंगु दु। उकथं हे छुं होटल व बीमा कम्पनीया शेयर भाः नं थहां वंगु दु ।
म्हिगः स्टाय्ण्डर्ड चार्टर बैंक, बैंक अफ काठमाण्डौं, लुम्बिनी बैंक, नेपाल इन्भेष्टमेन्ट बैंक व एसियन लाइफ इन्स्योरेन्सया शेयरं दकलय् अप्वः कारोवार याःगु दु ।
