राईं थःगु दक्वं जीवन प्रजातन्त्रया निंतिं समर्पण : प्रम

प्रधानमन्त्री माधवकुमार नेपालं मदुम्ह नेपाली कांग्रेसया नेता बलबहादुर राई प्रजातान्त्रिक आन्दोलनया छमह अथक योद्धा जूगु खँ धयादीगु दु । वय्कलं राईं थःगु दक्वं जीवन हे प्रजातन्त्र प्राप्तिया निंतिं समर्पण याःगु खँ धयादिल ।

नेपाली कांग्रेसया मू ज्याकू सानेपाय् तयातःगु मदुम्ह राईयात अन्तिम श्रद्धाञ्जलि बीधुंकाः प्रधानमन्त्री नेपालं पत्रकारत नाप खँल्हाबंला यानादिसें राई सादा जीवन व उच्च विचाः दुम्ह नेता जूगु धयादिल । वय्कलं लोकतान्त्रिक मूल्य मान्यता प्रति कर्तव्यनिष्ठा व संघर्षशील जुइगु हे राईया जीवनया आदर्ग जूगु धयादिल ।

न्ह्यावलें देय् व जनताया हितया निंतिं चिन्तित जुइम्ह राईं सरकारय् दुगु इलय् नं इमान्दार जुया ज्या याःगु धयादिसें प्रधानमन्त्री नेपालं वय्कया निधनं देशं छम्ह संघर्षशील व्यक्ति तंकूगु धयादिल ।