सरकार गठन बारे माओवादी-कांग्रेस सहलह
प्रधानमन्त्री माधवकुमार नेपालं राजीनामा बीधुंकाः दलत दथुइ न्हूगु सरकार गठन यायेत तीव्र रुपं न्ह्यानाच्वंगु सहलहया दथुइ थौं सरकारया नेतृत्वया दाबी यानाच्वंगु एनेकपा (माओवादी) व नेपाली कांग्रेस दथुइ सहलह जूगु दु ।
माओवादी अध्यक्ष पुष्पकमल दाहाल 'प्रचण्ड'या न्हू बजार स्थित छेँय् जूगु सहलहलय् माओवादी लडाकू समायोजन व न्हूगु सरकार गठनया बारे सहलह जूगु खः । खँल्हाबंलाय् कांग्रेस नेततय्सं माओवादी लडाकूया समायोजन प्रकृया मन्ह्यायेकं न्हूगु सरकार गठन जुइमफइगु खँ धाःगु खः ।
माओवादीं धाःसा संविधानसभाय् दकलय् तःधंगु दल माओवादी जूगु व माओवादीया नेतृत्वय् न्हूगु सरकार गठन जुसाः सेना समायोजन यायेगु ज्या अपुइगु धासें माओवादी नेतृत्वया सरकार गठन यायेत ग्वाहालि कांग्रेस नेतातय्त इनाप याःगु खः ।
न्हूगु सरकार गठनया बारे खँल्हाबंला यायेत कांग्रेस नेतात कृष्णप्रसाद सिटौला व अमरेशकुमार सिंह सोमवाः सुथय् प्रचण्ड निवास थ्यंकादीगु खः ।
