कांग्रेस-एमालें न्हापांगु बुँदा कार्यन्वयनया यायेत इनाप
नेपाली कांग्रेस व नेकपा (एमालें) जेठ १४ गते जूगु स्वंगू बुँदे सहमतिया न्हापांगु बुँदा कार्यन्वयन यायेत एनेकपा (माओवादी)यात इनाप याःगु दु ।
निगू दलया शीर्ष नेतात दथुइ आइतवाः एमाले संसदीय दलया ज्याकूथीइ च्वंगु बैठकं स्वंगू बुँदाया निगूगु व स्वंगूगु बुँदा कार्यन्वयन जुइधुंकूगुलिं आः न्हापांगु बुँदा इमान्दारी पूर्वक कार्यन्वयन यायेत इनाप याःगु दु । माओवादीं न्हापांगु बुँदा कार्यन्वयन मयागुलिं हे सहमतिय सरकार गठन जुइमफुगु धासें निगू दलं माओवादीं उगु सहमति पूवंके धुंकाः जक राष्ट्रिय सहमतिय सरकार गठन जुइफइगु निष्कर्ष पिकागु दु ।
बैठक लिपा एमाले अध्यक्ष झलनाथ खनालं माओवादीं जेठ १४ गते जूगु सहमतिलय् दुथ्याःगु शान्ति प्रकृया व संविधान निर्माण बारेया पुलांगु प्रतिबद्धता कार्यन्वयन यायेधुंकाः जक सरकार गठनया बारे सहलह जुइफइगु धयादिल ।
उखे आइतवाः हे संविधानसभाय् दुथ्याःगु झिंस्वंगू दलया बैठकं प्रमुख स्वंगू दलत हानं बुहमतीय सरकार गठन यायेत लगे जुयाच्वंगु प्रति आपत्ति प्वंकूसें हानं बहुमतीय सरकार गठन याःसा थःपिंसं अज्याःगु सरकरयात समर्थन यायेमफइगु खँ धाःगु दु ।
पुलांगु प्रतिनिधिसभा भवनय् च्वंगु बैठकं जेठ १४ गते जूगु सहमतिया न्हापांगु बुँदा कार्यन्वयन यायेत माओवादीयात इनाप नं याःगु दु ।
