स्थानीय निकाय मनोनयनया झिंन्हय्गू दलपाखें विरोध
स्थानीय निकाय पदाधिकारी मनोनयन यायेगु सरकारी तयारीया संविधानसभाय् प्रतिनिधित्व दुपिं झिंन्हय्गू चीचीधंगु दलतय्सं विरोध याःगु दु ।
झिंन्ह्यगु दलतय्सं स्थानीय निकाय निर्वाचनं गठन याइगु व निर्वाचन मजुतलेतकया निंतिं सर्वदलीय संयन्त्रमार्फत ज्या चले यायेमाःगु माग याःगु दु । राष्ट्रिय जनशक्ति, राष्ट्रिय जनमोर्चा, नेकपा एकीकृतनाप झिंन्ह्यगू दलतय्सं सरकारया निर्णय खारेजीया माग यासें आइतवाः सभामुख सुभाष नेम्वाङयात ज्ञापनपौ लःल्हात ।
प्रमुख प्रतिपक्षी दल कांग्रेसं मनोनयायात 'भागबण्डा प्रथा' धासें विरोध यानाच्वंगु दु । कांग्रेसं स्थानीय तहल् सर्वदलीय संयन्त्र देयेका संचालन यायेमाःगु अडान कयाच्वंगु दु । एमालें धासाः दक्वसिया सहमतिइ सर्वदलीय संयन्त्र देयेका स्थानीय निकाय गठनया पक्षय् दु ।
माओवादी नेतृत्वया सरकारं माघय् स्थानीय निकाय गठनया निंतिं गृहकार्य यायेत स्थानीय विकास मन्त्री रामचन्द्र झाया अध्यक्षताय् दुगु कार्यदलयात निर्देशन ब्यूगु खः । कार्यदलं जिल्ला विकास समिति नगरपालिका व गाविसय् दलया प्रतिनिधियात समानुपातिकरुपं स्थानीय निकायलय् मनोनयनया तयारी यायेवं चीचीधंगु दलतय्सं विरोधय् कुहांवःगु खः ।
२०५४सालया निर्वाचित प्रतिनिधिया म्याद सिधेवं स्थानीय निकाय कर्मचारीया भरय् साचालन जुया वयाच्वंगु दु ।
झिंन्ह्यगू दलतय्त प्रधानमन्त्री पुष्पकमल दाहाल प्रचण्डं चैत २५गते माओवादीया संसदीय दलया ज्याकूथी नापलायेगु ज्याझ्व क्व:छिगु दु ।
