'बाहिरी चक्रपथयात बजेट तये मते'
येँ(सन्ध्या टाइम्स)/नेवाः स्वायत्त राज्य मंकाः संघर्ष समितिं प्रस्तावित बाहिरी चक्रपथ निर्माणया ज्या तत्काल दिकेत माग याःगु दु। संघर्ष समितिं वंगु शुक्रवाः राष्ट्रिय योजना आयोगया उपाध्यक्ष डा. जगदीशचन्द्र पोखरेलयात छगू ज्ञापनपत्र लःल्हासें उगु माग याःगु खः। संघर्ष समितिया वर्तमान अध्यक्ष विपेन्द्र महर्जनं लःल्हाःगु ज्ञापनपत्रय् आः वइगु बजेटय् बाहिरी चक्रपथया लागिं गुगुं नं शीर्षकय् दां मफ्यायेत माग याःगु दु। ज्ञापनपत्रय् स्वनिगःया आदिवासी नेवाः समुदाय बाहिरी चक्रपथया पक्षय् मदु धासें राष्ट्रिय कानून सरह बाध्यात्मक अन्तर्राष्ट्रिय श्रम संगठन अनुबन्ध १६९ या प्रावधानकथं राज्यपक्ष आदिवासीया भूमियात कयाः याइगु गुगुं नं विकास निर्माणया ज्या याये न्ह्यः सम्बद्ध आदिवासी समुदायया पूर्वउजं कायेमाःगु सहमति नं अनिवार्य जुइगु खँ न्ह्यथनातःगु दु।
ज्ञापनपत्रय् प्यंगू दशक न्ह्यः स्वनिगः दुनेया चक्रपथ दयेकेधुंकाः थनया उर्बरा बुँ फुक्क छेँ जूवंगु खँ न्ह्यथँसें उकिं यानाः स्वनिगः विकासया नामय् विनाश जुयाच्वंगु खँ नं धयातःगु दु।
ज्ञापनपत्र लःल्हाना कासें आयोग उपाध्यक्ष पोखरेलं थुकी नेवाःतय्सं क्यंगु चिउताः बारे मन्त्रालयनाप सहलह यायेगु बचं बियादिल।
