ठमेल ल्वाभः न्याये मी याइगु केन्द्र: बीबीसी
येँ(सन्ध्या टाइम्स)/पर्यटकतय् नितिं स्वनिगःया मू लागा जुया वयाच्वंगु येँया ठमेल लागा आः वयाः ल्वाभः न्यायेमी याइगु केन्द्र जुया वःगु खँ अर्न्ताष्ट्रिय समाचार संस्थां बीबीसीं न्ह्यथंगु दु।
उगु लागा अवैध रुपं जुइगु चिचीधंगु ल्वाभःया कारोवारया केन्द्र जुजुं वयाच्वंगु खँ नं बीबीसीं धाःगु दु। येँया प्रहरी प्रमुख रमेश खरेलयात उद्घृत यासें बीबीसीं ठमेलयात ल्वाभः न्यायेमी याइगु केन्द्रया रुपय् विकास जुयाच्वंगु थःपिनि ठहर सार्वजनिक याःगु खः। रिपोर्टय् ठमेल लागा लागू वासःया कारोबार जुइगु नापं आपराधीत च्वनीगु थाय्या रुपय् हिलावंगुलिं पर्यटक नापं स्थानीय मनूतय्गु निंतिं नं खतरा अप्वयावंगु खँ धयातःगु दु।
बीबीसी थेंज्याःगु अन्तर्राष्ट्रिय संचार माध्यमं पित बिउगु थ्व रिपोर्टं यानाः सरकारं घोषणा यानातःगु पर्यटन वर्ष २०११ यात तकं बांमलाःगु लिच्वः लाकीगु खतरा दुगु खँ धाःगु दु। ठमेलय् येँदेय्या आपालं डनत च्वनेगु यानाच्वंगु दु।
