न्हापांगु नेवाः न्हिपौया सम्पादक मंत
कृष्णचन्द्रसिंह प्रधान नेपालभाषाया न्हापांगु न्हिपौ 'पासा'या न्हापांम्ह सम्पादक खः।
येँ(सन्ध्या टाइम्स)/नेपालभाषाया न्हापांगु न्हिपौ 'पासा'या न्हापांम्ह संपादक कृष्णचन्द्रसिंह प्रधान मंत। न्हापा बाःछिपौ जुयाच्वंगु 'पासा' लिपा न्हिपौ जुसांनिसें भाजु प्रधान ने.सं. १०७७ स उकिया न्हापांम्ह सम्पादक जुयादीगु खः। ८५ दँया बैंशय् म्हिगः सनिलय् वय्कः मदुगु खः।
भाजु प्रधानं नेपालभाषाय् न्हापांगु न्हिपौ शुरु यानादीगु खःसां खय् भाय् व नेपालभाषा साहित्यया समालोचना ख्यलय् वय्कःया तःधंगु योगदान दु। वय्कलं नेपालभाषा साहित्यया आपालं पुलांपिं व न्हूपिं साहित्यकारपिनि रचनाय् समालोचना यानादीगु दु। नेपालभाषाय् वय्कलं यानादीगु वय्कःया समालोचना मुनाः 'झीगु साहित्यय् बाखं' व 'पलाःचिं लिना' नांगु निगू सफू पिहां वःगु दुसा मेगु आपालं रचना थीथी पत्रिका व थीथी च्वमिपिनि सफुली पिहां वयाच्वंगु दु।
नेपालभाषाया मेम्ह समालोचक इन्द्र मालीया कथं भाजु प्रधान नेपालभाषाय् गहन विश्लेषणात्मक व निष्पक्ष टिप्पणी यानादीम्ह समालोचक खःसा वय्कलं नेपालभाषाया आत्मपरक निबन्ध विधाय् न्हूगु आयाम हयाबिउगु खः।
वय्कलं खय् भाषाय् नं आपालं कृति बियादीगु दुसा वय्कःयात आपालं सिरपालं सम्मानित नं यानातःगु दु।
