एसएलसी: अन्नपूर्ण विरुद्ध गोरखापत्र अख्तियारय्
येँ(सन्ध्या टाइम्स)/थुगुसी पिहां वइगु एसएलसीया रिजल्ट इतिहासय् हे न्हापांखुसी सरकारी न्हिपौ 'गोरखापत्र' य् छापे मजुइगु जूगु दु। एसएलसीया रिजल्ट छापे यायेत परीक्षा नियन्त्रण कार्यालयं बिउगु ठेक्काय् घोटाला जुयाः गोरखापत्रयात थुगुसी थ्व अवसर मबिउगु खँ गोरखापत्र संस्थानया प्रवन्ध निर्देशक शम्भु श्रेष्ठं कनादीगु दु। थुकिया विरुद्ध थौं गोरखापत्रं अख्तियार दुरुपयोग अनुसन्धान आयोगय् नं उजुरी तयेत्यनागु खँ वय्कलं 'सन्ध्या टाइम्स'यात कनादिल। वंगु ७० दँ न्ह्यवंनिसें गोरखापत्रं एसएलसीया रिजल्ट छापे याना वयाच्वंगु खः।
थुगुसी रिजल्ट छापे यायेत तःगु टेण्डरय् गोरखापत्रं प्रति सिम्बोल नम्बर ६ तकां छापे यायेगु भाः बिउगु खःसा अन्नपूर्ण पोष्ट न्हिपौया आप्का प्रकाशनं ६ तका २० पैसाया भाः तःगु खः। प्रति सिम्बोल नम्बर २० पैसा म्हो खयां नं परीक्षा नियन्त्रण कार्यालयं गोरखापत्रयात थ्व टेण्डर मबिसे अप्वः भाः तःम्ह अन्नपूर्ण पोष्टयात बिउगुलिं प्रस्ट जुइक हे भ्रष्टाचार जूगु खनेदुगु दावी गोरखापत्रं याःगु दु। एसएलसीया रिजल्ट थौं जारी यानाः कन्हय् छापे याकीगु खँ दु। आः थ्व मुद्दा अख्तियारय् वन धाःसा कन्हय् नं रिजल्ट छपाई मजुइफुगु खँ धाःगु दु। उखे पनिकां धाःसा थौं सनिलया ५ बजे रिजल्ट पिकायेगु ग्वसाः दयेकातःगु खँ सीदुगु दु।
