थःगु हे पार्टीया नेतृत्वय् सरकार गठन यायेगु माओवादी निर्णय
इमान्दार जुसाः माओवादी नेतृत्व बारे सहलह जुइफु : एमाले
संविधानसभा अन्तर्गत दकलय् तःधंगु दल नापं प्रमुख प्रतिपक्षी एनेकपा (माओवादीं) थःगु पार्टीया नेतृत्वय् न्हूगु सरकार गठन यायेगु निर्णय याःगु दु । बिहीवाः माओवादी मू ज्याकू पेरिस डाँडाय् च्वंगु माओवादी स्थायी समितिया बैठकं माधवकुमार नेपाल नेतृत्वया सरकार पूर्ण रुपं असफल जूगु निष्कर्ष पिकासें आः थःगु हे पार्टीया नेतृत्वय् सहमतिय सरकार गठन यायेगु निर्णय याःगु दु ।
सहमतिय सरकार गठनया बारे मेगू दलत नाप सहलह यायेत पार्टी अध्यक्ष पुष्पकमल दाहाल 'प्रचण्ड'या नेतृत्वय् छगू वार्ता पुचः नं गठन याःगु दु । उगु वार्ता पुचलय् माओवादीया वरिष्ठ उपाध्यक्ष मोहन वैद्य 'किरण' व मेम्ह उपाध्यक्ष डा. बाबुराम भट्टराई दुजः कथं च्वनादीगु दु ।
उखे नेकपा (एमाले) स्थायी समितिया बैठकं माओवादीं शान्ति प्रकृया व संविधान निर्माणया बारे इमान्दार जुयाः कार्यतालिका न्ह्यब्वसाः माओवादी नेतृत्वया सरकारया बारे सहलह यायेफइगु निर्णय याःगु दु ।
बैठकं प्रधानमन्त्रीया राजीनामा लिपा जेठ १४ गते जूगु सहमतिया बुँदा नं ३ पूवंगु व आः बुँदा नं १ व २ कार्यन्वयन यायेत माओवादीयात इनाप याःगु दु । नापं बैठकं राष्ट्रपति डा. रामवरण यादवं आह्वान यानादीगु ईया दुने हे सहमतिय सरकार गठन यायेगु निंतिं मेमेगू दलनाप सहलह तीव्र रुपं न्ह्याकेगु निर्णय याःगु दु ।
उखे संविधानसभाय् दुथ्याःगु चिधंगु १७ दलया बैठकं सहमतिय सरकार गठनया निंतिं प्रमुख स्वंगू दलयात इनाप याःगु दु । उगु दलतय्सं न्हूगु सहमतिय सरकारय् थःपिंनिगु दलयात नं दुथ्याकेत इनाप याःगु दु । नापं प्रमुख दलतय्त संविधान प्रकृया न्ह्याकेत नं इनाप याःगु दु ।
