प्रधानमन्त्री नेपालं राष्ट्रपतियात राजीनामा लःल्हात
प्रधानमन्त्री माधवकुमार नेपाल राष्ट्रपति डा. रामवरण यादवयात थःगु राजीनामा लःल्हानादीगु दु । बुधवाः सनिलय् राष्ट्रया नांमय् सम्बोधन यानाः थःगु राजीनामा घोषणा यानादी धुंकाः प्रधानमन्त्री नेपालं राष्ट्रपतियात थःगु राजीनामा लःल्हानादीगु खः । वय्क राष्ट्रपति भवन शितल निवास थ्यंकाः थःगु राजीनामा लःल्हानादीगु खः ।
झिंस्वला तक प्रधानमन्त्री जुयादीम्ह नेपालया राजीनामा राष्ट्रपतिं स्वीकृत याये धुंकाः वय्क पदमुक्त जुयादीगु संवैधानिक व्यवस्था दु । पदमुक्त जुसां मेगू सरकार गठन मजुतल्ले वय्कलं काम चलाउ सरकारया प्रधानमन्त्री कथं ज्या यानादी ।
प्रधानमन्त्री नेपालया राजीनामा नापं संसदय् दकलय् तःधंगु स्वंगू दल एनेकपा (माओवादी), नेपाल कांग्रेस व नेकपा (एमालें) न्हूगु सहमतिय सरकार गठनया निंतिं पहल सुरु यायेगु खँ धाःगु दु । न्हूगु सरकारया प्रधानमन्त्रीया दाबेदार कथं माओवादी अध्यक्ष पुष्पकमल दाहाल 'प्रचण्ड', उपाध्यक्ष डा. बाबुराम भट्टराई, कांग्रेस वरिष्ठ नेता शेरबहादुर देउवा, संसदीय दलया नेता रामचन्द्र पौडेल व एमाले अध्यक्ष झलनाथ खनालया नां न्ह्यने वयाच्वंगु दु ।
