युरोप भ्रमण तसकं सफल : प्रम
प्रधानमन्त्री पुष्पकमल दाहाल प्रचण्डं थःगु युरोप भ्रमण तसकं सफल जूगु खँ धयादीगु दु ।
छवाःयंकया युरोप भ्रमण सिधयेकाः शनिवाः देय् लिहां झायेवं अन्तरर्राष्ट्रिय विमानस्थलय् पत्रकारतनाप खँ ल्हानादिसें प्रम प्रचण्डं अपेक्षाकथं हे भ्रमण सफल जूगु दाबी यानादिल । वयेकलं नर्वे व फिनल्यान्ड निगूलिं देय्या प्रधानमन्त्री, मन्त्रीलगायत उच्च अधिकारीतनाप सहलह यानागु व नेपाःया शान्ति प्रक्रियायात ग्वहालि यायेत सकारात्मक आश्वासन व:गु जानकारी बियादिल ।
भ्रमणया झ्वलय् प्रधानमन्त्रीं नेर्वेलय् स्वन्हु व फिनल्यान्डय् निन्हु च्वनादीगु खः । वयेकलं निगू पक्षया ग्वहालिया ख्यः अप्वयेकीगु समझदारी पतिइ हस्ताक्षर तकं याना वयागु जानकारी बियादिल । वयेकलं नेपाःया परिवर्तनयात आत्मसात् यासें नर्वे व फिनल्यान्डं हाइड्रोपावर, विद्युतीय ट्रान्समिटर, पोलिटेक्निकल इन्ष्टिच्युट थंज्याःगु ख्यलय् ग्वहालि यायेगु प्रस्ताव यानाःगु जानकारी बियादिल । नर्वें पोलिटेक्निकल च्याकेगु खँय् ग्वहालि यायेगु प्रतिबद्धता प्वंकूगु खँ कनादिल ।
प्रधानमन्त्री दाहाल झिंगुम्हेसिया पुचःया नेतृत्व यानाः शनिवाः नर्वे व फिनल्याण्डया भ्रमणया निंतिं उखेपाखे झायादीगु खः ।
अथेहे प्रम दाहालं थीथी संचार माध्यमं चर्चा यानाच्वंगु 'बेबी किङया' खँ वाहियात व असम्भव धयादिल । वयेकलं धयादिल, 'बेबी किङया खँ गंगा अःकथं बाः वंगु थें हे खः ।'
