प्रधानमन्त्री माधवकुमार नेपाल पाखें राजीनामा
प्रधानमन्त्री माधवकुमार नेपालं थ:गु पदपाखें राजीनामा बियादीगु दु । वय्कलं प्रमुख प्रतिपक्षी दल एनेकपा (माओवादी)या असहयोगया कारणं शान्ति व संविधान निर्माण पूवंकेमफुगु धयादिसें थ:गु नेतृत्वया सरकारया पक्षय् बहुमत दुसां शान्ति व संविधान निर्माणया ज्या पूवंकेत थम्हं राजीनामा बियागु खँ धयादिल ।
प्रधानमन्त्री निवास बालुवाटरय् बुधवा सनिलया खुता: इलय् राष्ट्रया नांम सम्बोधन यानादिसें वय्कलं थ:गु नेतृत्वय् सरकार गठन जुइधुंका हे प्रमुख प्रतिपक्षी दलं निशेधया मानसिकता कथं न्ह्या वनेत स्वगु व निरन्तर असहयोग व अवरोध या:गु द्वपं बियादिल ।
वय्कलं थ:गु नेतृत्वया सरकार पुलांगु सहमतियात कार्यन्वयन याना सहमतिया प्रणाली पाखें न्ह्यावनेत
स्वगुलिं झिंस्वला तक २२दल दथुइ सहमति व सहकार्यया कथं हे न्ह्या वंगु तर सरकार गठन नापं थीथी पक्षं अवरोध, आन्दोलन, अर्मयादित बिचाया कारणं सरकारयात ज्या याये थाकूगु धयादिल । वय्कलं थीथी पक्षया बाधा व्यवधान जुसां थ:गु कार्यकालय् तुलनात्मक रूपं सुरक्षा अवस्था क्वातुगु दाबी नं यानादिल ।
वय्कलं लडाकू समायोजन यायेत विस्तृत कार्यतालि दयेका सरकार न्ह्यावंगु जुसां माओवादीया ग्वाहालि मदुगु कारणं थुकीयात पूवंकेमफुगु धयादिसें थ:गु राजीनामा लिपा माओवादीयात पुलांगु सहमति कार्यन्वयन याना हिंसाया राजनीति त्व:ता नागरिक पार्टीलय् हिलेत इनाप यानादिल ।
