प्रधानमन्त्रीं थौं सनिलय् राजीनामा बीगु

प्रधानमन्त्री माधवकुमार नेपालं थौं सनिलय् राष्ट्रया नांमय् सम्बोधन यानादिसें राजीनामा बियादीगु जूगु दु । प्रधानमन्त्री निकट उच्च स्रोतया कथं थौं सनिलय् खुताः इलय् प्रधानमन्त्री निवास बालुवाटार पाखें सम्बोधन याना राजीनामा बीगु खँ धाःगु दु ।

बुधवाः च्वंगु मन्त्रीपरिषद्या बैठकय् नं प्रधानमन्त्रीया राजीनामाया बारे खँल्हाबंला जूगु खःसा आः प्रधानमन्त्री नेकपा (एमाले)या स्थायी समितिया बैठकय् ब्वति कायेत एमाले मुख्यालय बल्खुइ दु । एमाले स्थायी समितिया बैठक लिपा वय्कलं सत्ता समर्थित दलत नाप बैठक च्वनीसाः वयां लिपा मन्त्रीपरिषद्या बैठक लिपा राष्ट्रया नांमय् सम्बोधन यानादी ।

खुताः इलय् याइगु सम्बोधन लिपा वय्कलं न्हय्ताः इलय् राष्ट्रपति डा. रामवरण यादवयात थःगु राजीनामा पौ लःल्हानादीगु ज्याझ्वः दु ।