नागाल्यान्डया गृहमन्त्रीयात नेपा:या विमानस्थलय् ज्वन

भारतया नागाल्यान्ड राज्यया गृहमन्त्री इमकोङ एल एमचेन्यात येँया अन्तर्राष्ट्रिय त्रिभुवन विमानस्थलय् प्रहरीं ज्वंगु दु । नेपालय् प्रतिबन्धित न्यास व द्वछिया लखौं तका बराबरया नोट सहित वय्कयात ज्वंगु दु । थःगु छेँज:या इहिपाया निंतिं नेपाः झायादीम्ह इमचेनयात बुधवाः सुथय् झिताः इलय् विमानस्थल प्रहरीं ज्वंगु दु । झिंस्वम्ह छेँजः सहित नेपाः भ्रमणय् झायादीम्ह गृहमन्त्री एमचेन्यात भारत लिहाझायेत्यंगु इलय् प्रहरीं ज्वने धुंकाः तिनि वय्कलं थः भारत नागाल्यान्ड राज्यया गृहमन्त्री जूगु खँ धायादीगु खँ सिदुगु दु । वय्कयात ज्वना अनुसन्धान जुयाच्वंसा थुकीया बारे प्रहरी अधिकारीतय्सं आधिकारीक रुपं छुं नं खँ धाःगु मदुनी ।