किपुली नेवाः राज्यया अभ्यास
किपू (सन्ध्या टाइम्स)/नेवाः स्वायत्त राज्यया अवधारणा अनुरुप नेवाः राज्यया अभ्यास यायेगु थाय् कथं किपू नगरपालिका लागायात ल्यःगु दु ।
किपूयात नेवाःतय्गु लागा कथं अभ्यास यायेगु खँय् म्हिगः किपुली नेवाः स्वायत्त राज्य मंकाः संघर्ष समिति व नेवाः स्वायत्त राज्य मंकाः परिषद किपूया पदाधिकारी, सल्लाहकार व दुजःपिंलिसे सहलह जूगु खः ।
सहलह ज्याझ्वलय् नेवाः स्वायत्त राज्य मंकाः संघर्ष समितिया नायः विपेन्द्र महर्जन, सचिवालयया कजि मल्ल के. सुन्दर, दुजः नापं सभासद् दिलीप महर्जन, विरेन्द्रभक्त श्रेष्ठ, मंकाः परिषद् किपूया नायः पुचःया कजि पंचलाल महर्जन, नायः पुचःया दुजःपिं राममान सिंह, नजरराम महर्जन, सल्लाहकार डा. शिव शरण महर्जन नापं उगु सहलह मुँज्याय् ब्वति कयादीपिं सकल नेवाः आन्दोलनया न्ह्यलुवा व कार्यकर्तातय्सं किपुली हे नेवाः स्वायत्त राज्यया अभ्यास याये माःगु बिचाः प्वंकूगु खः ।
किपुली राजनीतिक रुपं विभाजित जूसां नेवाः राज्यया सवालय् फुक्क हे राजनीतिक पार्टीया नेवाःतय् दथुइ छगू हे मत दुगु नापं राजनीतिक रुपं तकं माःगु कथं भूमिका म्हितेफुगु व बांलाःगु लकस दुगुलिं किपूयात नेवाः लागाया नमूना कथं नेवाः स्वायत्त राज्यया अवधारणाया आधारय् अभ्यास याना यंकेगु खँ जूगु खः। थ्वहे झ्वलय् आः याकनं पित बीत्यंगु किपू नगरपालिकाया न्हूगु बजेट नं नेवाः राज्यया अवधारणा कथं हे दयेके बीगु खँ फुक्कं दलया नेतात सहमत जुइधुंकूगु दु ।
