सरकारवादी दलतय्गु बैठक
येँ (सन्ध्या टाइम्स)/वइगु २१ गतेनिसें न्ह्याइगु व्यवस्थापिका संसदया बजेट अधिवेशनया नितिं सरकार पक्षया दलतय्सं म्हितेमाःगु भूमिकाया बारे सहलह ब्याकेत थौं बैठक च्वनेत्यंगु दु। प्रमुख प्रतिपक्षी माओवादीं संसद संचालन हे याके मबीगु ख्याच्वः बिउगु नापं संसदय् माओवादीं पंगः थन धाःसा गुकथं न्ह्याः वनेगु धइगु खँय् सहलह ब्याकेत थ्व बैठक च्वनेत्यंगु खः ।
सहलहया झ्वलय् देशय् ब्वलनाच्वंगु राजनीतिक गतिरोध चीकेगु नापं दलतय् दथुइ पिहां वयाच्वंगु समस्या समाधान याना वनेगु निंतिं थःपिंसं म्हितेमाःगु भूमिकाया बारे नं बिचाः ब्याकी धाःगु दु ।
बैठकय् एमाले, कांग्रेस नापं सरकारय् दुथ्याःगु झिगुलिं मल्याक दलया नेतातय्सं ब्वति काइ ।
