'सहमति मार्फत समस्या समाधान या'
संविधानसभाय् दुथ्याःगु चिधंगु दलतय्सं प्रमुख स्वंगू दलयात सहमति मार्फत याकनं समस्या समाधान यायेत इनाप याःगु दु ।
प्रमखु स्वंगु दल एनेकपा (माओवादी), नेपाली कांग्रेस व नेकपा (एमाले) सहित संविधानसभाय् दुथ्याःगु नीगू दलया बैठकय् चिधंगु दलं जेठ १४ गते जूगु स्वंगू बुँदे सहमति कार्यन्वयनया निंतिं तत्काल गम्भीर जुया पहल यायेत स्वंगू दलयात इनाप याःगु दु ।
येँया न्हू बानेश्वर स्थित संविधानसभा भवनय् मंगलवा: च्वंगु बैठकय् राष्ट्रिय सहमतिया निर्माणया निंतिं प्रमुख स्वंगू दल गम्भीर जुइमफुगुलिं गतिरोध अप्वयावंगु खँ धाःगु दु । नापं चिधंगु दलतय्सं स्वंगू दलयात शान्ति व संविधान निर्माणया ज्या पूवंकेत राष्ट्रिय सहमतिय सरकार गठन यायेत पला: न्ह्याकेत इनाप नं याःगु दु ।
प्रमुख स्वंगू दल दथुइ जेठ १४ गते जूगु सहमति कार्यन्वयन जुइफेवं अप्वयाच्वंगु राजनीतिक गतिरोधया कारणं संविधान निर्माण प्रकृया हे छखे लाःगु धासें चिधंगु दलतय्सं प्रमुख दलतय्त दबाव बीत थौंया बैठक आह्वान याःगु खः ।
