संसद अधिवेशन अन्यौलय् : सभामुख नेम्वाङ
सभामुख सुवासचन्द्र नेम्वाङं प्रमुख राजनीतिक दलत दथुइया असहमतिया कारणं न्हूगु संसदया बैठक अन्यौलय् लाःगु खँ धयादीगु दु । वय्कलं स्वंगू दलत दथुइ सहमतिया वातावरण म्हो जुयावनाच्वंगुलिं जनताय् निराशा अप्वयावंगु बिचाः प्वंकादिल ।
पूर्व सांसद क्लब नेपालया साधारणसभा व संसद दिवसया लसताय् मंगलवाः येँय् जूगु छगू ज्याझ्वलय् न्ववानादिसें सभामुख नेम्वाङं संविधानसभाया म्याद थप यायेगु इलय् स्वंगू दलत दथुइ जूगु सहमति कार्यन्वयन मजूगुलिं व्यवस्थापिका संसदया वइगु दँया अधिवेशन अन्यौल व आशंकाया घेराय् लाःगु खँ धयादिल ।
ज्याझ्वलय् नेपाली कांग्रेस संसदीय दलया नेता रामचन्द्र पौडेलं लोकतन्त्रया मूल्य व मान्यताय् हे आक्रमण जुयाच्वंगु खँ न्ह्यथनादिसें लोकतान्त्रिक सिद्धान्तया आधारय् राज्य संचानल वा ल्वाभःया भरय् राज्य न्ह्याकेगु धइगु हे आःया प्रमुख लडाइँया विषय जूगु धयादिल ।
