माओवादी क्रियाकलापं अराजकता अप्वल : कोइराला
विपक्षी दलया नेता नेपाली कांग्रसया सभापति गिरिजाप्रसाद कोइरालां अप्वयाच्वंगु अराजकताया हुनिं देश असफल राष्ट्र जुइत्यंगु खँ धयादीगु दु । प्रेस युनियन पर्सा शाखं शनिवाः सुथय् वीरगन्जय् याःगु पत्रकार सम्मेलनय् कोइरोलां माओवादी क्रियाकलापं अराजकत अप्वःगु द्वपं बियादीगु दु ।
दक्व ख्यलय् अराजकता अप्वया वंगु व थुकीयात याकन हे नियन्त्रण यायेमफुसा देय् असफल राष्ट्र जुइ धयादिल । देय्यात थौं तकःया स्थिति थ्यंकेत माओवादीया ल्हा दुगु द्वपं बियादीगु दु । पशुपतिनाथया पुजारीया खँयात कया धार्मिक आस्थाय् आक्रमण यायेगु, सर्वोच्चया आदेशया विरोध यायेगु व नेपाली सेनाय् हस्तक्षेप नापं पत्रकारयात ज्वनेगु थंज्याःगु क्रियाकलापं प्रजातन्त्र कमजोर यायेगु माओवादीया कुतः प्रष्ट जूगु कोइरालाया धापू दु ।
रिपोर्टस क्लबया अध्यक्ष ऋषि धमलायात ज्वनाः दक्व पत्रकारतय्त ख्यायेत माओवादीं स्वयाच्वंगु खँ धासें कोइरालां धमलायात अविलम्ब रिहा यायेत इनाप यानादिल । कोइरालां धयादिल, 'धमलानाप जिगु तःहाकःगु सम्बन्ध दु । धमलां ल्वाभ तइथें व अज्याःगु गतिविधि याइ धाइगु विश्वास मदु ।' वय्कलं वनाप हे ज्वंपिं मेपिं निम्ह पत्रकारतय्त नं त्वत्येत इनाप यानादिल ।
अथेहे कोइरालां पुलांम्ह युवराजं पार्टी च्यायेकीगु बारे थम्ह महत्व मबियाःगु खँ कनादिल । वीरगन्जय् कोइरालां धयादिल, 'जीं वयाः धापूयात इमपोट्यान्स बिमखु ।'
