मुस्लिम मोर्चाया नेता ज्वन
येँ (सन्ध्या टाइम्स)/ हिन्दू युवा संघया नायः काशी तिवारीया हत्या याःगु द्वपनय् प्रहरीं एकीकृत माओवादीया भ्रातृ संगठन मुस्लिम मुक्ति मोर्चाया केन्द्रीय दुजः जालिम मियाँयात ज्वंगु दु ।
माओवादीया भोजपुरा राज्य समितिया दुजः तकं जुयाच्वंम्ह मियाँयात वंगु चान्हय् पर्साया जगन्नाथपुर गाविसं ज्वंगु खः धकाः प्रहरी नायव उपरीक्षक सन्जीव शर्मां जानकारी बियादीगु दु ।
हिन्दू संघया नायः तिवारीया हत्याय् संलग्न दुगु आशंकाय् वीरगन्जया थीथी लागां थ्व सिबें न्ह्यः ज्वंपिनिगु सुचंया आधारय् मियाँयात प्रहरीं ज्वंगु खः। प्रहरीं उगु घटनानाप स्वापू दुगु आशंकाय् वंगु चान्हय् भारतया सीतामाढीया निरजकुमार सिंह, रामगढया अरविन्द पटेल, पर्साया
नारायण शाह व वीरगन्जया श्रीलाल गुप्तायात नं ज्वंगु दु ।
उखे हिन्दू युवा संघया नायः काशी तिवारीयात शनिवाः गोलीं कयेकाः स्याना बिउगु विरोधय् उगु संघं आह्वान याःगु वीरगन्ज अनिश्चितकालीन बन्दया झ्वलय् थौं निन्हुया दिनय् नं वीरगन्ज बन्द जूगु दु ।
उगु संघं वीरगन्जया कलकारखाना, यातायात, पसः बन्द आह्वान याःगुलिं जनजीवन तकं प्रभावित जूगु दुसा शिक्षण संस्था धाःसा थनिंनिसें संचालन जूगु दु ।
