'आयोगं प्राविधिक ज्या जक याये फइ'
येँ (सन्ध्या टाइम्स)/संविधानसभाया राज्य पुनर्संरचना नापं राज्य शक्ति बाँडफाँट समितिया सभापति लोकेन्द्र बिष्ट मगरं दलतय्सं समितिया प्रतिवेदनयात अःखः यायेत राज्य पुनर्संरचना आयोग गठन यात धाःसा संविधान हे दयेके फइ मखु धयादीगु दु ।
थौं 'सन्ध्या टाइम्स' लिसे खँ ल्हासें वय्कलं समितिया प्रतिवेदन हे अःखः यायेगु निंतिं आयोग दयेकेगु खँ जुयाच्वंगु खयेफु धासें यदि आयोग हे दयेकेगु जूसा प्राविधिक विषयय् ज्या यायेगु निंतिं जक दयेकेमाः मखुसा बांलाइ मखु धयादिल। वय्कलं जनप्रतिनिधि सभासद्पिनि समिति सिबें नं मनोनित यानाः हयातःपिनिगु आयोग गुगुं नं हालतय् च्वय् लाइ मखु धकाः नं दावी यानादिल ।
थःगु नेतृत्वय् दुगु संविधानसभाया समितिं तयार याःगु राज्य पुनर्संरचनाया प्रतिवेदनयात फुक्क हे धइथें सभासदतय्सं राजनीतिक व सैद्धान्तिक ल्याखं समर्थन यायेधुंकूगु दावी नं भाजु मगरं यानादिल। राज्य पुनर्संरचना समितिं तयार याःगु राज्य पुनर्संरचनाया प्रतिवेदन वये धुनेवं हे ततःधंगु दलया छुं नेतात हीमी चाःगु खँ नं वय्कलं कनादिल ।
ततःधंगु स्वंगू दलया नेतातय्सं वंगु १४ गते संविधानसभाया म्याद थप याःगु लछि दयेधंकूगु अवस्थाय् नं संविधान दयेकेगु निंतिं सँ छपु नं संके फयाच्वंगु मदु धासें वय्कलं यदि संविधान दयेकेगु खःसा वइगु फागुन महिनाया दुने संविधानया मस्यौदा दयेकाः जनतायाथाय् यंकेमाः धकाः नं धयादिल ।
