पेट्रोलियम पदार्थया ढुवानी शनिवाः निसें शुरु जुइगु
नेपाल पेट्रोलियम ढुवानी महासंघ व सरकार दथुइ शुक्रवाः जूगु वार्तालिपा महासंघं वंगु आइतवाः निसें दिनाच्वंगु पेट्रोलियम पदार्थया ढुवानी शनिवाः निसें सुचारु यायेगु सहमति जूगु दु ।
नीदँ न्ह्यःया ट्याङ्कर हटेयायेगु नेपाल आयल निगमया निर्णय सरकारी स्तरपाखें पूवने माःगु व न्हूगु ट्याङ्कर न्यायेगु सम्झौत रद्द यायेमाःगु महासंघया माग वार्ताय् पूवनेवं व्यवसायी पेट्रोलियम पदार्थ ढुवानी यायेत सहमत जूगु खः ।
ट्याङ्कर थप यायेगु विषयलय् निर्णय यायेत धासाः निगम, महासंघ व पेट्रोलियम डिलस्र एसोसिएसनया प्रतिनिधि दुथ्याःगु समिति गठन यायेगु निर्णय जूगु दु । औद्योगिक क्षेत्रया निंतिं झितका छुत बिया डिजेल मीगु बन्द यायेमाःगु लगायतया पेट्रोलियम डिलस्र एसोसिएसनया मागत बारे शुक्रवाः बहनि लिबाक्क तक वार्ता जूगु खः । थ्वस्वयां न्ह्यः आन्दोलनरत पेट्रोलियम व्यवसायी व सरकारी वार्ता पुच दथुइ शुक्रवाः सुथय् च्याताः ईलय् जुइगु धाःगु वार्ता न्हिनय् झिंनिताः ईलय् तिनि सुरु जूगु खः ।
बिहिवाः जकः सरकारं आन्दोलनरत् पेट्रोलियम व्यवसायीत नाप वार्ता यायेत वाणिज्य व आपूर्ति मन्त्रालयया सचिव पुरुषोत्तम ओझाया कजिसुइ न्याम्ह दुजः दुगु वार्ता पुचः गठन याःगु खः ।
