'माकुगु विष'या लिपांगु ब्व पिदन
बाखं अनुमान याःपिं स्वम्हेसित सिरपाः
येँ (सन्ध्या टाइम्स)/वरिष्ठ उपन्यासकार मथुरा साय्मिया उपन्यास 'माकुगु विष' या प्यंगूगु ब्वया पितब्वज्या जूगु दु। मूपाहां संस्कृतिविद् व नेपालभाषा एकेडेकिया चान्सलर सत्यमोहन जोशीं सफूया पितब्वज्या यानादीगु खः ।
ज्याझ्वःया उलेज्या नापं सफूया पितब्वज्या यानादिसें वय्कलं "माकुगु विष" उपन्यासया प्रकाशन साहित्यिक विधाया तःधंगु उपलब्धि खः धयादिल ।
सफूया समीक्षा समालोचक इन्द्र मालीं यानादिल।
ज्याझ्वः वरिष्ठ साहित्यकार रामशेखर नकःमिया सभापतित्वय् जूगु खः। सफूच्वमि मथुरा साय्मिं थम्हं च्वयेगु दिकागु ताः ई दयेधुंकूसा नं कुतः पिकाकया नायः विमल ताम्रकारया हःपालं हाकनं च्वसा न्ह्याकाः थुगु उपन्यास तयार यानागु खँ कनादिल। ज्याझ्वलय् बाखं च्वमि लक्ष्मण राजवंशी व लक्ष्मीदास मानन्धरं नं नुगःखँ प्वंकादीगु खः ।
ज्याझ्वलय् 'माकुगु विष'या प्यंगूगु ब्वया कथानक थथे जुइमाः धकाः अनुमान यानाः च्वया हयादीपिं मध्ये भाजु एच. के. कपालीयात न्हापांगु सिरपाः कथं न्याद्वः दां, मनिषा मानन्धरयात लिउ सिरपाः कथं निद्वः दां गिन्नीबाबा वज्राचार्ययात हःपाः कथं द्वःछि तका दांसिरपाः लःल्हाःगु खः ।
