झलनाथ खनाल मन्त्रीत नाप लायेत व्यस्त

नेकपा एमालेया अध्यक्ष झलनाथ खनाल एमाले बाहेकया मन्त्रीतलिसे खँल्हाबल्हाय् व्यस्त जुयादीगु दु । राष्ट्रिय सहमतिया सरकार गठनया लागि खनालं थुकथंया खँल्हाबल्हा यानादीगु सिइदुगु दु ।

खनालया थःगु हे छेँ डल्लुइ थौं उपप्रधानमन्त्री विजयकुमार गच्छदार नाप लाना दीगु दु । मधेसी जनअधिकार फोरम (लोकतान्त्रिक) या अध्यक्ष समेत जुयादीम्ह गच्छदारलिसेया वय्कःया खँल्हाबल्हाया मू विषयवस्तु सरकार परिवर्तन जूगु धाःगु दु ।

अथे हे नेपाली काङ्ग्रेस, तमलोपा, माले लगायतया मन्त्रीतलिसे नं वय्कलं नाप लानाः सहलह यानादीगु दु । म्हिगः खनालं नेकपा संयुक्तया अध्यक्ष चन्द्रदेव जोशीलिसे खँल्हाबल्हा यानादीगु खः ।