धनुषाय् स्वम्हसिया हत्या

धुनाषाया हरिहरपुरस्थित जलाद खुशी स्वम्ह ल्याम्हतय् सीम्ह लुइकूगु दु ।

हरिहरपुर ८या झिंखुदँ दुम्ह सुकुना महतो व नीखुदँया विहारी महतोयात गपःकिया स्यानातःगु अवस्थाय् लुइकूगु खसाः हरिहरपुर ७या मेघा बम्जन लामायात ज १ प १५५४ नम्बरया ट्याक्टय् चिनाः स्यानातःगु अवस्थाय् प्रहरीं लुइकूगु खः ।

उमित शुक्रवाः सनिलय् हत्या याःगु खसां शनिवाः सुथसिया च्यातः ईलय् तिनि सीम्ह लुइकूगु खः । घटना स्थलय् प्रहरीं अनुसन्धान न्ह्याकूगु दु । सीपिं माओवादी गाँ स्तरीय कार्यकर्ता जूगु खँ धाःगु दु ।
लामा स्थानीय विद्यालया प्राधानाध्यापक खः । स्थानीय संचारकर्मीतय्त फोन याना घटनाया जिम्मा भाइरस किलस्र नांया भुमिगत संस्थां काःगु दु । घटनाया विरोधय् स्थानीय जनता व सीपिनि छेँजःपिंसं ढल्केवर-जनकपु सतकय् चक्काजाम याःगु दु ।