लडाकूया खँय् माओवादीं 'बार्गेनिङ्ग' : रक्षामन्त्री
रक्षामन्त्री विद्यादेवी भण्डारीं एनेकपा (माओवादीं) दक्वं लडाकूतय्त सुरक्षा निकायलय् समायोजन यायेमा:गु धकाः 'बार्गेनिङ्ग' यायेत स्वःगु खँ धयादीगु दु । वय्कलं दक्वं लडाकूत सुरक्षा निकायलय् समायोजन याये असम्भव जूगु नं धयादिल ।
आइतवाः पोखरा विमानस्थलय् पत्रकारत नाप खँल्हाबंला यानादिसें वय्कलं माओवादीया माग पुलांगु सम्झौता विपरीत जूगु धयादिल । वय्कलं अन्तर्राष्ट्रिय मापदण्ड कथं छपू ल्वाभः छम्ह लडाकूयात मान्यता ब्यूगु धयादिसें थन ३४०० ल्वाभः जक जूगुलिं नं दक्वं लडाकूत समायोजन यायेमफइगु धयादिल ।
माओवादीया पोलिटब्यूरो बैठकं दक्वं लडाकूत समायोजन यायेमाःगु निर्णय सार्वजनिक या:गु कन्हय् कुन्हु रक्षामन्त्री भण्डारीं सुरक्षा निकायलय् सामुहिक रुपय् लडाकू समायोजन यायेमफइगु बिचाः प्वंकादीगु ख: । वय्कलं सरकारं माओवादी लडाकू व ल्वाभया समस्या बैधानिक तरिकां समाधान यायेत स्वयाच्वंगु धयादिसें लडाकूतय् व्यक्तिगत इच्छाया आधार समायोजन प्रकृया न्ह्याकेमाःगु धयादिल ।
