संविधानसभाया कार्यतालिका बारे सहमति जुइमफुत

संविधानसभाया न्हूगु कार्यतालिका दयेकाः न्ह्याः वनेगु विषयया बारे सहलह यायेत च्वंगु प्रमुख स्वंगू दलया शीर्ष नेतातय् बैठक बिना निष्कर्ष क्वचाःगु दु ।

संविधानसभा अध्यक्ष सुवासचन्द्र नेम्वाङया सक्रियताय् जूगु उगु बैठकय् माओवादीं न्हापा जेठ १४ गते जूगु स्वंगू बुँदे सहमित कार्यन्वयन जुइमाःगु अडान का:गु खः । येँया न्हू बानेश्वर स्थित संविधानसभा भवनय् जूगु बैठकय् माओवादीं स्वंगू बुँदे सहमति कार्यन्वयन मजुइकं मेगू विषयया बारे सहलह यायेमफइगु खँ धाःगु खः ।

बैठक लिपा संविधानसभा अध्यक्ष नेम्वाङं बैठक सकारात्मक जूगु प्रतिक्रिया बियादिसां प्रमुख स्वंगू दलया शीर्ष नेतातय्सं धाःसा छुं नं प्रतिक्रिया बियामदी । संविधानसभाया अध्यक्ष सहित वंगु बुधवाः च्वंगु मुख्य स्वंगू दलया बैठकय् संविधान निर्माणया प्रकृया न्ह्याकेगु सहमति जूगु खः ।