माओवादीं हिंसायात निरन्तरता ब्यूगु प्रति पौडेलया आपत्ति
नेपाली कांग्रेस संसदीय दलया नेता रामचन्द्र पौडेलं एनेकपा (माओवादी) राजनीतिक मूधारय् वयेधुंकाः नं हिंसात्मक गतिविधियात निरन्तरता बियाच्वंगु खँ धयादिसें अज्याःगु खँ प्रति आपत्ति प्वंकादीगु दु ।
शनिवाः गोरखाय् माओवादीया युवा संगठन वाईसीएलया कार्यकर्तातय्सं दाःया घाःपाः जूपिं कांग्रेसया कार्यकर्तातय्त येँया महारजगंज स्थित शिक्षण अस्पतालय् नापलायेधुंकाः पत्रकारत नाप खँल्हाबंला यानादिसें वय्कलं माओवादीं थः नाप सहमत मजूपिनि खँ न्यनेमफुगु धयादिसें माओवादीं अज्याःगु व्यवहार मत्वतेकं शान्ति प्रकृया सफल जुइगु धयादिल ।
वय्कलं माओवादीयात हानं थंज्याःगु कथंया गतिविधि मयासें नागरिक पार्टीलय् रुपान्तरण जुइत इनाप यानादिल । वय्कलं घटनाया दोषीया कडा कारवाही यायेत नं माग यानादिल ।
शनिवाः गोरखाया घ्याम्पेसाल स्थित दुल्लभ उच्च मावि संचालक समिति गठनया विषयलय् विवाद जुइवं माओवादी कार्यकर्तातय्सं कांग्रेस कार्यकर्तातय्त आक्रमण याःगु खः । उगु आक्रमणय् लानाः छम्ह प्रहरी नापं स्वम्ह कांग्रेस कार्यकर्ता घाःपा जूगु खः ।
