संविधान निर्माण व सेना समायोजन नापं : माओवादी
एकीकृत नेकपा (माओवादीं) संविधान निर्माण व सेना समायोजन यायेगु ज्या नापं जुइमाःगु निर्णय या:गु दु । माओवादी पोलिटब्यूरोया बैठकं संविधान निर्माण व सेना समायोजनया कार्यतालिका सहित नापं यंकेगु निर्णय याःगु दु ।
शुक्रवाः क्वचाःगु माओवादी पोलिटब्यूरो बैठकया निर्णय सार्वजनिक यायेत शनिवाः ग्वसाःग्वःगु पत्रकार सम्मेलनय् माओवादी अध्यक्ष पुष्पकमल दाहाल 'प्रचण्डं' नेपाली सेना व माओवादी सेना निगुलिं सेनायात विस्तृत शान्ति सम्झोता व अन्तरिम संविधानं बराबरीया हैसियतय् तःगु दावी यानादिल ।
वय्कलं नेपाली सेनाया लोकतान्त्रिकरण व जनमुक्ति सेनाया व्यवसायीकरण लिपा सेना समायोजन यानाः राष्ट्रिय सेना दयेकेमाःगु धयादिसें आः हे समायोजन जुइपिं लडाकुतय् ल्याः क्वःछीगु खँ शान्ति सम्झौता विपरीत जूगु धयादिल ।
आःया सुरक्षा निकायया मापदण्ड कथं सेना समायोजन यायेगु खँ सम्झौताय् उल्लेख मजूगु धयादिसें प्रचण्डं समायोजनया स्थापित मापदण्ड व राजनीतिक सहमतिया आधारय् अन्तर्राष्ट्रिय मापदण्डया आधारय् सेना समायोजन जुइमाःगु धयादिल
पोलिटब्यूरो बैठकं राष्ट्रिय सहमतिय सरकारया नेतृत्व माओवादीं हे यायेगु निर्णय याःसां पार्टी पाखें सुनां सरकारया नेतृत्व यायेगु धइगु बारे छुं निर्णय याःगु मदु । अथेहे सत्तारुढ दलतय्सं जेठ १४ गतेया सहमति कार्यन्वयन यानाः वर्तमान सरकार काम चलाउ सरकारय् परिणत मजुइकं बजेट व नीति व ज्याझ्वः प्रस्तुत यायेमबीगु निर्णय नं याःगु दु ।
माओवादी मू ज्याकू पेरिस डाँडाय् असार १ गते निसें न्ह्याःगु माओवादी पोलिटब्यूरो बैठक झिंछन्हु लिपा शुक्रवाः क्वचाःगु खः । बैठकय् पार्टी अध्यक्ष प्रचण्डं सरकारया नेतृत्व माओवादीं यायेगु सम्भावना म्हो जूगु धासें राजनैतिक प्रतिवेदन न्ह्यब्वयादीगु खः ।
उगु प्रतिवेदनय् अधिकांश पोलिटब्यूरो दुजतय्सं थःथःगु बिचाः प्वंकूसें अझ नं माओवादी नेतृत्वया सरकारया सम्भावना दुगुलिं सरकारया नेतृत्व माओवादीं हे यायेमाःगु खँय् बः ब्यूगु खः । दक्वं दुजतय्सं थःथःगु बिचाः प्वंकेधुंकाः प्रचण्डं नेतातय् न्ह्यसःया लिसः बियादिसें संशोधित राजनैतिक प्रतिवेदन पारित याःगु खः ।
