अमेरिका भ्रमणय् दुपिं नेतातय्त लिहांवयेत माओवादी निर्देशन
एकीकृत नेकपा (माओवादीं) अमेरिकाया भ्रमणय् दुपिं थःगु पार्टीया स्वम्ह नेतातय्त लिहांवयेत निर्देशन ब्यूगु दु । अमेरिकाया बोस्टनय् जुइत्यंगु छगू ज्याझ्वलय् ब्वति कायेत पार्टी पाखें वनेत्यंपिं प्यम्ह नेतात मध्ये पोलिटब्यूरो दुजः अग्निप्रसाद सापकोटायात भिसा मब्यूगुलिं मेपिं स्वम्ह नेतातय्त नं पार्टीं लिहांवयेत निर्देशन ब्यूगु खः ।
माओवादी प्रवक्त दिनानाथ शर्मां छगू विज्ञप्ति पिथना पार्टीया इज्जत व मर्यादाय् आँच लाइगु कथं जूगु थंज्याःगु ज्या प्रति असहमति प्वंकूसें उगु ज्याझ्वलय् ब्वति कायेत वःपिं कमरेडतय्त तत्काल लितसतेगु निर्णय यायेत बाध्य जूगु खँ न्ह्यथनातःगु दु ।
अमेरिकाया बोस्टनय् नेपाःया राजनीतिक पार्टीत दथुइ शान्तिया निंतिं करुण केन्द्रया ग्वसालय् जुइत्यंगु बोस्टन सम्झौता व राज्य निर्माण सम्बन्धी अन्तर्क्रिया ज्याझ्वलय् ब्वति कायेत माओवादी पाखें सचिव सीपी गजुरेल, स्थायी समिति दुजः टोपबहादुर रायमाझी व पोलिटब्यूरो दुज पम्फा भुसाल अमेरिकाय् दी ।
