कान्तिपुरया ११ कन्टेनर न्युजप्रिन्ट त्व:तल
भारतया कोलकता बन्दरगाहलय् लच्छि न्ह्यः निसें रोके यानातःगु कान्तिपुर पब्लिकेशनया ११ कन्टेनर न्युजप्रिन्ट त्वःतुगु जानकारी नेपाः स्थित भारतीय दूतावासं ब्यूगु दु ।
शुक्रवाः न्हिनय् कान्तिपुर पब्लिकेशनया अध्यक्ष नापं प्रबन्ध निर्देशक कैलाश सिरोहिया व भारतीय राजदूत राकेश सूद दथुइ जूगु खँल्हाबँलाय् सूदं ११ कन्टेनर न्युजप्रिन्ट त्वःतुगु जानकारी बियादीगु खः । खँल्हाबंलाय् सिरोहियां निगू देय्या पारवहन सन्धि कथं बिना अवरोध न्युजप्रोन्ट नेपाः वयेदइगु जूगुलिं कान्तिपुर पब्लिकेशनया दक्वं न्युजप्रिन्ट छुटे यायेत राजदूत सुदयात इनाप यानादीगु खः ।
राजदूत नापया खँल्हाबंला लिपा सिरोहियां छगू विज्ञप्ति पिथनादिसें भारतय् रोके यानातःगु ३९ कन्टेनर न्युजप्रिन्ट मध्ये ११ कन्टेनर न्युजप्रिन्ट सहलह लिपा त्वःतुगु खँ धयादीगु दु । नापं विज्ञप्तिइ ल्यं दुगु २८ कन्टेनर नं वइगु सोमवाः तकया दुने त्वतीगु विश्वास प्वंकातःगु दु ।
