'वाइसीएल विघटन मखु विस्तार'
येँ (सन्ध्या टाइम्स)/एकीकृत माओवादीया पोलिटब्यूरो दुजः जनार्दन शर्मा 'प्रभाकरं' वाइसीएल विघटन मखु अझ विस्तार याना यंकेगु जुइ धयादीगु दु। सत्तारुढ दलत व सरकारं वाइसीएलया अधैसैन्य संरचना विघटन जुइमाः धइगु सर्त तयाच्वंगु इलय् पुलांम्ह शान्तिमन्त्री प्रभाकरं थ्व बिचाः न्ह्यःने हयादीगु खः ।
रुकुमया सदरमुकामय् थौं सुथय् याःगु छगू ज्याझ्वलय् न्ववासें वय्कलं थ्व खँ धयादीगु खः। नेता शर्मां कार्यकर्तातय्त नापलानाः सामाजिक ज्याय् जनतानाप जुयाः लोकंह्वाःगु स्वये मफयाः हे संसदवादी नेतातय्सं वाइसीएल विघटन यायेमाः धकाः म्वाःमदुगु तर्कत तयाच्वंगु खँ नं वय्कलं धयादिल ।
आः विकासया निंतिं फुक्क हे गामय् वाइसीएल विघटन मखु विस्तार याना यंकेगु जुइ धासें वय्कलं ल्याय्म्हत मदयेकं विकास जुइ मखु धयादिल। वय्कलं राजनीतिक आन्दोलन नाप नापं विकास नं यंकेमाःगु खँ नं अन ध्वाथुइकादीगु खः ।
