जनयुद्धया वृत्तचित्र भारतय् प्रतिबन्ध
येँ (सन्ध्या टाइम्स)/तत्कालिन नेकपा (माओवादीं) याःगु झिदँ ताःहाकःगु जनयुद्धयात दुथ्याकाः तयार याःगु छगू वृत्तचित्रय् भारत सरकारं प्रतिबन्ध तया बिउगु दु ।
आनन्दस्वरुप बर्मा व आशिस श्रीवास्तवया निर्देशनय् दयेकूगु १२५ मिनेटया 'फ्लेम अफ द स्नो' नांगु वृत्तचित्रयात अथे प्रतिबन्ध तया बिउगु खः। भारतया झारखण्ड नापं थीथी राज्यय् भारतीय माओवादीत झन झन अप्वया वयाच्वंगुलिं उगु वृत्तचित्रं इमित उर्जा बी धकाः अनया केन्द्रीय चलचित्र प्रमाणीकरण बोर्डं थ्व प्रतिबन्ध तःगु खः ।
नेपाःया माओवादी आन्दोलनं निरंकुश राजतन्त्रया अन्त्य व सामाजिक, आर्थिक रुपान्तरणय् हःगु हिउपाः सम्बन्धी घटनावलीत दुथ्याकातःगु उगु वृत्तचित्रय् भारतया माओवादीया छुं नं खँ न्ह्यथनातःगु मदु। वृत्तचित्रया निर्देशक बर्मा माओवादीप्रति झुकाव दुम्ह वरिष्ठ पत्रकार खःसा श्रीवास्तव न्हापा डिस्कभरी च्यानलय् ज्या यायेधुंकूम्ह खः ।
