प्रजातान्त्रिक शक्तित छप्पं जुइत कोइरालाया आह्वान
नेपाली कांग्रेसया सभापति गिरिजाप्रसाद कोइरालां दक्व प्रजातान्त्रिक शक्तित छप्पं जुइत आह्वान यानादीगु दु ।
शुक्रवाः वीरगन्जय् शुरु जूगु नेपाल ट्रेड युनियन कंग्रेसया एकता महाधिवेशनय् संवोधन यासें प्रजातन्त्रया नामय् प्रजातन्त्र हे सिधेकीग कुत जुयाच्वंगुलिं प्रजातन्त्रवादी शक्तित छप्पं जुइमाः धयादिल । वयेकलं धयादिल, 'तरल अवस्थाया फाइदा कया थीथी नामय् प्रजातान्त्रीक संरचना स्यंकेगु कुत जुयाच्वंगु दु । थ्वपाखें देय्यात बचे यायेत दक्वं प्रजातान्त्री शक्ति मिलेजुया वनेमाः ।'
हस्तक्षेप मजदुरतय् क्षेत्रय् नं जुइफुगु धासें थुकी सचेत जुइत इनाप यानादिल । कोइरालां संवैधानिक निकायय् तकं हस्तक्षेप जुइगु बांलाःगु संकेत मखु धयादिल ।
संवोधनया झ्वलय् कोइरालां थः ब्वनाः मखसें मजदुर आन्दोलनं थौं तकया स्थितिइ थ्यंगु खः धयादिल । मजदुरतय् हरेक मागय् थःगु नं सहमति दइ धयादिल । वयेकलं धयादिल, 'छिकिपंसं न्ह्याःगु प्रस्ताव पारित यासां जिं मिखाः तिसिना सहकति प्वंके ।'
'ट्रेड युनियन कांग्रेस' व 'डिकोन्ट' दथुइ जुइत्यंगु न्हापांगु अधिवेशन यात 'एकता महाधिवेशन' नां बियातःगु दु । महाधिवेशन उल्लेज्याया झ्वलय् अखिल नेपाल ट्रेड युनियन महासंघया अध्यक्षा सालिकराम जमकटेल व जिफन्टया अध्यक्ष मकुन्द न्यौपाने नं भिंतुना ब्यूगु खः । अधिवेशन आइतवाः तकः जुइ ।
