थनिंनिसें आदिवासी फिल्म फेष्टिभल

येँ (सन्ध्या टाइम्स)/नेपाल अन्तर्राष्ट्रिय आदिवासी फिल्म फेस्टिभल (आइफा) या ग्वसालय् थनिंनिसें प्यक्वःगु फिल्म फेष्टिभल शुरु जुइत्यंगु दु। थुगुसीया फेष्टिभलय् नेपालभाषाया छगू हे जक फिल्मं ब्वति कयाच्वंगु दु। कन्हय् शनिवाः ४ बजे प्रिमियर जुइत्यंगु थ्व नेवाः फिल्म 'माया : द लभ' खः। निक्वःगु महोत्सवय् 'भिंतुना' पाखें क्रिटिक्स च्वाइस एवार्ड त्याकेत ताःलाःपिं निर्देशक आर्यम नकःमि व सुनिता राजभण्डारी श्रेष्ठया मंकाः निर्देशनय् दयेकूगु थ्व फिल्मय् थौं स्वयां न्यय्दँया जातीय विभेदय् ब्वलंगु मतिनाया बाखं न्ह्यब्वयातःगु दु ।

थगुने जूगु महोत्सवय् प्रिनाराज जोशीं दयेकूगु 'ग्वाय्मरु' डकुमेन्ट्रीं विशेष सिरपाः त्याकूगु खः ।

आइफां न्ह्याकाच्वंगु आदिवासी जनजाति फिल्म सिरपाः ज्याझ्वःपाखें प्रभावित जुयाः आः मेमेगु संस्थातय्सं नं थज्याःगु सिरपाः ज्याझ्वःत याना हःगु दु। थ्व झ्वलय् छायाछबी डि सिने अवार्ड ज्याझ्वः थगुने याःगु खः। थ्व संस्थां थुगुसी नं थज्याःगु ज्याझ्वः यायेत्यंगु दु ।

अथे हे संकिपा सम्बन्धी सरकारी निकाय चलचित्र विकास बोर्डं नं थुगुसीया राष्ट्रिय चलचित्र पुरस्कार ज्याझ्वलय् मूलधारया खस व्यावसायिक फिल्मनापं आदिवासी जनजाति भाषाया फिल्मयात नं राष्ट्रिय पुरस्कार बीगु जूगु दु। न्हापा जूसा छगू जक भाषाया फिल्म कःघाना वयाच्वंगु चलचित्र विकास बोर्डं थगुने तिनि मेमेगु भाय्या फिल्मयात नं संरक्षण यायेगु तातुनाः 'आदिवासी जनजाति मातृभाषी चलचित्र प्रवर्द्धन समिति' धकाः बिस्कं समिति गठन याःगु खः। नवीन सुब्बा संयोजक जुयादीगु उगु समितिइ नेवाः संकिपाकःमिपाखें विजयरत्न तुलाधर 'असंबरे' दुजः कथं दुथ्याः ।